۴.۳ — نظمیں (میر تقی میر کی غزلیات)

میر تقی میر ۱۷۲۲ء میں اکبر آباد (جو آج کا آگرہ ہے) میں پیدا ہوئے۔ ان کے والد کا نام علی متقی تھا، جو بہت نیک اور درویش طبیعت کے آدمی تھے — یعنی وہ دنیا کی دولت اور شان و شوکت سے دور رہتے تھے۔ میر نے ابتدائی تعلیم اپنے والد کے دوست سید امان اللہ سے حاصل کی۔

میر تقی میر کی زندگی شروع ہی سے دکھوں سے بھری رہی۔ جب وہ صرف گیارہ سال کے تھے، تو ان کے والد اس دنیا سے رخصت ہو گئے۔ اس کے بعد قریبی رشتہ داروں نے بھی ان کا ساتھ نہ دیا۔ یوں وہ بہت کم عمری میں بالکل اکیلے رہ گئے اور زندگی کی مشکلات سے خود مقابلہ کرنا پڑا۔

میر تقی میر کا زمانہ بہت خراب تھا۔ مغل سلطنت کمزور ہو چکی تھی۔ دہلی پر اندر سے بغاوتیں ہو رہی تھیں اور باہر سے حملے ہو رہے تھے۔ یہ سیاسی بدحالی میر کی شاعری میں صاف نظر آتی ہے۔

بعد میں میر تقی میر لکھنؤ چلے گئے۔ وہاں نواب آصف الدولہ نے انہیں تین سو روپے ماہانہ وظیفہ (یعنی ہر مہینے تنخواہ) دی۔ اگر وہ چاہتے تو آرام کی زندگی گزار سکتے تھے، مگر ان کی ضدی اور بے نیاز طبیعت نے انہیں کسی کے سامنے جھکنے نہیں دیا۔ وہ کبھی کسی بادشاہ، نواب یا راجہ کو خاطر میں نہیں لاتے تھے۔

میر تقی میر نے ۱۸۱۰ء میں نوے سال کی عمر میں لکھنؤ میں وفات پائی۔ وہ اردو ادب کے ایک بہت بڑے اور روشن ستارے تھے۔ ان کے بعد اردو شاعری کی دنیا کبھی ویسی نہ رہی۔